Zizurkilgo Mendibailaran murgilduz

Zizurkilgo Mendibailaran murgilduz

Basoen artetik eta erreka ondotik ibiliko gara Zizurkilgo Mendibailaran barrena

Zizurkilgo Mendibailarak Adunarekin egiten du muga ia bere luzera osoan, eta bertan murgilduko gara basoetan barrena murgilduz zein Ibituri errekaren ertzetik. Ibilbidea Zizurkilgo plazan hasiko dugu, elizaren zimiterioa zeharkatu eta aurrean ateratzen den errepidean gora joango gara, aparkalekua eskuinean utziz.

Hasiera nahiko maldatsua izango dugu, eta hamar minutu inguru beharko ditugu lehenengo baserri multzora iristeko. Eraikinen erditik igaroko gara eta goruntz jarraituko dugu, nahiz eta bidea lauagoa izango den hemendik aurrera.

Minutu gutxian bidegurutze batera iritsiko gara. Eskuineko bidetik jarraituko dugu, beheruntz, Legargain eta Astabere aldera. Kilometro bat inguruko jaitsiera egingo dugu errepidetik.
Segituan hasiko gara errekaren soinua entzuten, eta gutxira, Lepasoro baserriaren aurreko zubitxora iritsiko gara.

Zubia zeharkatu gabe, errekaren ondotik jarraituko dugu aurrera, berriro ere aldapan gora eginez. Kontuz egin beharreko ibilbide zatia da, basoko hezetasunaren eta euriaren eraginez zorua irristakorra egon baitaiteke.

Lehenengo aldaparen ondoren, malda zertxobait lauagoa bihurtuko da, eta ondoren, bihurgune bat igaro ondoren, bidea lauagoa izango da, beti ere aldapan gora jarraituz. Hamar minutu inguru daramagunean, basotik aterako gara eta paisaiaz gozatzeko aukera edukiko dugu metro batzuetan, berriro ere basoan murgildu aurretik.

Minutu gutxian mendi-bidea errepide batera aterako da, Ibarzabal etxearen aurrean. Puntu honetan bi aukera ditugu. Herrigunera zuzenean itzultzeko, errepide nagusitik behera jaitsiko gara, eta ordu laurden pasatxoan berriro plazara bueltatuko gara. Bestela, bidean metro batzuk aurrera egin eta Egieta etxearen aurretik ezkerretara doan errepidea jarraituko dugu. Minutu gutxian Lepasorora jaisteko bidegurutzera iritsiko gara. Bertatik, eskuinera jarraituz itzuliko gara plazara.

 

• Iraupena: 1 h. 10 m.
• Zailtasuna: erraza
• Desnibela: 86 m.
• Distantzia: 4,5 km.
• Irteera: Zizurkilgo plaza

Inguruan

‘Baserriko Argia’ eskultura

‘Baserriko Argia’ proiektua Emakume Baserritarrek Elkarteak (EBEL) sortu zuen emakume baserritarrei ikusgarritasuna emateko. Juan Gorriti artistak egin zuen eskultura eta 2002an inauguratu zuten. Burdinez egindako eskultura da eta bi metroko altuera du. Gorritik berak proiekturako egindako hainbat obrekin erakusketa ibiltaria egin zen eta hainbat udalek lagundu zuten proiektua finantzatzen obra horien erosketarekin. Guztien artean bat aukeratu zen handian egiteko eta Zizurkilgo herrigunearen gainaldean kokatzea adostu zuten.

Probalekua

Udaletxearen aurreko plazak garai bateko errekarriekin egindako zoladura du. Udaletxea XVIII. mende hasieran eraiki zuten, nahiz eta ez dagoen argi ordurako probalekurako plaza egina zegoen. Bertan daude ikusgai erabili izan diren harrietako batzuk. Gaur egun hainbeste ekitaldi hartzen ez baditu ere, proba batzuk antolatu ohi dira, besteak beste, herriko jaietan.

 

Muga

Zizurkilek zortzi herriekin egiten du muga: Amasa-Villabona, Anoeta, Asteasu, Aia, Usurbil, Zubieta / Donostia, Andoain eta Aduna. Guztira 22 kilometroko mugalerroa du eta 135 mugarri inguru topatu daitezke. Hala ere, Mendi bailarak Adunarekin mugatzen duen eremuan hein handi batean errekak markatzen du bi herrien arteko lerroa. Ibilbidea Lepasoro baserri ondotik igarotzen da, Adunako lurretan, Ibituri edo Lepasoro erreka baita muga.

Legargain

Izena ematen dion muinoko magalean kokatuta dago Legargain baserria. XVII. mendean agertzen da dokumentuetan aipatuta, Aretazpikoa baserriko ganadu-borda bezala, horren gainean eraiki zuten baserria hurrengo mendean. Eraikin hartatik ez da ezer iritsi gaur egunera, gutxira sute batek kiskali baitzuen eta II. Karlistadan, Belabietako guduaren baitan, erre egin omen zen ere. XX. mendearen erdialdera erdia saldu egin zen eta, ordutik, bitan banatuta ageri da.

Txantxangorri aldizkaria etxean jaso nahi baduzu, erreportajeak online argitaratu aurretik, egin zaitez harpidedun hemen.

Erreportajea gustatu bazaizu, jarrai iezaguzu sareetan (X, Facebook eta Instagram) gure edukiez gozatzeko. Gainera, proposamen edo iradokizunen bat helarazi nahi badiguzu, txantxangorri@txantxangorri.info helbidera idatz diezagukezu.