Ordiziako Euskal Jaietako Azoka berezia irailaren 10ean egingo da

Ordiziako Euskal Jaietako Azoka berezia irailaren 10ean egingo da

Euskal Jaien baitan Gazta Lehiaketaren 52. edizioa egingo da aurten Ordiziako Beti Alai pilotalekuan

Iraileko egitarauaren baitan Euskal Jaiak antolatu dituzte aurten ere Ordizian. Astebetez euskal kulturan oinarritutako ekitaldi ugari egingo dira irailaren 5tik 14ra bitartean. Egun garraitzitsuena beste behin Azoka Berezia izango da, irailaren 10ean egingo dena.

Egun horretako ekitaldi Nagusia LII. latxa edo karrantzanako ardiaren esne gordinez egindako gazta-lehiaketa izango da. Hala ere, ez dira faltako Fruitu eta barazki-lehiaketa, Euskal Oiloaren lehiaketa-erakusketa, Gipuzkoako piriniar arrazako behi-azienda lehiaketa.

Aurten Gazta Lehiaketak 52. urteurrena beteko du, izatez zaharragoa bada ere, lehiaketa arautu eta epaimahaiarekin egiten hasi zenetik. Hamar urte beranduago hasi ziren Kutxak babestutako Urrezko Garaikurra ematen, azken hamar urteetan hiru aldiz lehiaketa irabazi duten artzainei. Aurten ‘S.C. Kortaria’ gaztandekiko Julen Arburua (2018, 2019) eta La Leze gaztandegiko Eli Gorrotxategi eta Jose Mari Jauregik dute garaikurra irabazteko aukera.

Lehiaketa, goizeko 10:00etan hasiko da eta, eta hainbat sukaldari, gastronomia-adituk eta kazetarik osatuko du epaimahaia, Pedro Subijana Lehendakari dutela. Aurtengoan, epaimahai honetako kide hainbat urtetan izandako eta lehiaketaren sustapenean lan handia egindako hiru pertsonak hil ondorengo omenaldi sentitua jasoko dute; hain zuzen, Jose Mari Ustarroz (Idiazabal Jatorri Izendapeneko lehendakari ohia), Fermin Leizaola etnografoa eta Luis de Lezamak (Lezama taldeko lehendakaria) 2025 urtean zenduak.

Lehiaketaren amaieran gazta sarituaren enkantea egingo da Beti Alai frontoian. Lehengo urtearen antzera, frontoian presente daudenekin batera, online ere egin ahal izango dira eskaintzak. Bestalde, 2014. urteaz geroztik gazta-lehiaketan irabazle izan diren artzainen gazten salmenta puntuak, Beti-Alai pilotalekuko frontoi txikitian egongo dira.

Azoka Bereziak 410 urte

Ordiziak 1512an jaso zuen asteazkeneko azoka egiteko errege-baimena Joana Erreginaren eskutik, urte hartako martxoaren 18an sute batek herria ondatu ondoren. Mende bat geroago, 1614an, San Bartolome egunean urtero azoka berezia egiteko eskumena eman zion Felipe III.a erregeak, izen bereko ermita inguruan. Festa garrantzitsua antolatzen zen horren baitan.

Urte batzuk beranduago irailera aldatu zen, irailaren 8tik gertuen zen asteazkenera. Gainera, ermita ondotik herrigunera ere igaro zen azoka.

Horrela, XX. mende hasieran Antoine D’Abbadik bultzatutako Lore Jokoen baitan, ‘Fiestas vascas’ izendapenarekin antolatu zituzten Ordiziako Udalak eta Gipuzkoako Foru Aldundiak. Euskal izaera balioan jartzeko jaiak ziren: literatura, musika, abeltzaintza, nekazaritza, kirolak eta abar lantzen ziren eta hainbat txapelketa ere antolatzen ziren. Gaur egungo jaiaren aurrekari den festa hau 1904an antolatu zen lehen aldiz. Urte hartan egin zen baita ere gaur egungo azokaren ekitaldi ezagunetakoa, Ardi latxaren esnearekin artzainek egindako gaztaren txapelketa. Oraingo txapelketa 1960ko hamarkadan sortu zen, ezaguna da txapelketa irabazten duen gazta-erdiaren enkantea.

Euskal Jaien hasierako edizioetan Udala bazen antolatzaile nagusia, gaur egun Ordiziako hainbat elkartek eta taldek parte hartze dute astebetez luzatzen den egitarauan.

Ikusi hemen zuzenean gaztaren enkantea:

 

Erreportajea gustatu bazaizu, jarrai iezaguzu sareetan (X, Facebook eta Instagram) gure edukiez gozatzeko. Gainera, proposamen edo iradokizunen bat helarazi nahi badiguzu, txantxangorri@txantxangorri.info helbidera idatz diezagukezu.